AKA AKPARALA MMADỤ ASAA NA-ALA ỤTỤ N’ỤZỌ EZIGHỊ EZI NA STEETI ANAMBARA

Spread the love

N’Amansii di n’Ọka, na steeti Anambara, ka aka ndi nche obodo kpara mmadụ asaa n’ụzọ ochie si Enugwu gawa Ọnịcha, ebe ha kwuchiri ụzọ ma na-ala ndi ọkwọ ụgbọala gwongworo ego n’ụzọ akwụghị ọtọ.

Ọbụ site na igba mbọ ndi minisrị steeti ahụ na-ahụ maka azụmahịa na-agba, ịkwụsị ndi ji ụzọ aghụghọ ana ego na steeti ahụ ka ejiro jichie ndi a.

Mgbe ọ na-agwa ndi nta akụkọ okwu n’Ọka, n’ụbọchị Tuusdee gara aga ka Kọmoshiọna steeti ahụ na-ahụ maka azụmahịa, bụ Dọkinta Kristan Madụbuko gbarụrụ ihu katọọ ajọ akparamagwa ndi a na-ana ndi mmadụ ego n’ụzọ ezighị ezi. Ọ kachakwa njọ mgbe gọọmenti dọchaara aka na ntị megide nke a.

Mmadụ asaa ndi a gụnyere ụmụ nwoke isii nakwa otu nwanyị, ha na-anata ego maka ihe akọtara n’ubi nakwa ego ụlọ ọrụ mmepo na azụm-ahịa (produce fee and Commerce and Industry fee); site n’aka ndi ọkwọ ụgbọ-ala ukwu gwongworo.

Madụbuko sịrị na ndi a jiri ihe kpụchie ụzọ ma na-abagide ndi ọkwọ ụgbọ-ala gwongworo a, were ana ha ego n’anya íké.

Onye Kọmishiọna steeti ahụ na-ahụ maka adịm ọcha gburugbure ebe obibi ndi mmadụ, bụ Mazị Maikel Okonkwọ katọkwara ụdị ajọ akparama-agwa ahụ ma kwue na ọtụtụ ndi mmadụ ndi ọzọ jikwa aghụghọ anara ndi mmadụ ego maka adịm ọcha. Okonkwọ kwuru na mgbe na adịghị anya, na minisrị ya ga-amalite inwude ndi na-akpa ajọ agwa a. Ọ kpọkuru ndi mmadụ steeti ahụ ka ha sie imi n’ala nke ọma tupu na ha akwunye onye maọbụ ndi ọbụla ego ha n’aka.

O kwuru na gọọmenti steeti ahụ si n’aka onye isi ndi ọrụ steeti ahụ nye ụfọdụ ndi mmadụ akwụkwọ maka ilakọtara steeti ahụ ego kwesịrị ekwesi na ndi mmadụ ga-akwụ.

Ọ sịkwara na otu onye n’ime ndi a ana-ama imi kọwara onwe ya dịka onye nlekọta nke ndi steeti ahụ na-ahụ maka ndi na-akwọ ụgbọ-ala gwongworo n’ala anyị. Aha nwoke a bụ Madụka, onye Ụkpo dị na steeti Anambara. Madụka kwuru hoohaa, na ya nakwa ndi otu ya na-anata ndi mmadụ ego n’ụzọ ezighị ezi n’Amansii. O kwuru na ọ bụ kọmishiọna na-ahụ maka ọrụ ugbo nyere ikike maka ịnata ego ndi a.

Mgbe akpọtụrụ kọmishiọna steeti Anambara na-ahụ maka ọrụ ugbo bụ Mazị Afam Mbanefo, ọ kwụrụ ọtọ gọọ aka n’ụkwụ ya maka ebuboo a.

Leave a Reply

Your email address will not be published.