Ọkaikpe Teresia Matheka nke ụlọikpe ukwu Nairobi, Kenya ekpebiela na ịbụ nwunye bụ ọrụ kwụrụ onwe ya kwesịrị na-eri ụgwọ ọrụ.
Na mkpebi ya, n’okwu esemokwu di na nwunye, Ọkaikpe ahụ kwuru na o zighi ezi ịsị na o nweghị ego ọbụla nwanyị na – elekọta ezinụlọ na-ewebata n’ụlọ.
“Ọ dị mfe nwoke ịzọkọrọ akụnụba nile, na ọ bụ ego ọ kpatara ka e jiri zụọ ha mana ọ bụ nwanyị nọ n’ụlọ jiri ego ahụ were nweta akụnụba ndị ahụ.
“Ọzọkwa, ilekọta ụmụaka anya bụ ọrụ ezinụlọ ụfọdụ na – akwụ mmadụ ụgwọ maka ya. Etu a ka ọ dịkwa isi nri na idebe ụlọ ọcha.”
Nwanyị gbara akwụkwọ n’ụlọ ikpe bụ nwanyị ya na di ya gbaworo alụkwaghịm, onye chọrọ ka e ree akụnụba nile ezinụlọ ahụ nwere, ka ya na nwoke ahụ kee ego ya ụzọ abụọ.
