Sinikiwe Kademaunga, nwanyị Zimbabwe a mụrụ na mkpirisi aka na ụkwụ, onye dị afọ iri abụọ n’isii dịzị ime ọmụmụ ugbua.
Nwanyị ahụ a mụrụ n’enweghị ikpere aka na ikpere mere na aka na ụkwụ ya dịcha mkpirisi bụ onye a maara na Mbaụwa maka mbọ ọ na-agba ihu na ndị nwere ọlụsị nwere ùgwù dịịrị ha.
Kademaunga, kọwara na o nwere ọtụtụ ihe iche aka mgba oge ọ na-etolite maka ọlụsị ya.
“Oge a mụrụ m, ọ hịara nne na nna m ahụ ikweta na m nwere ọlụsị maka na a na-ahụta nwa ji ọlụsị bịa ụwa dịka abụm ọnụ si n’aka Chineke”
Kademauga na – eji mkpirisi aka ya ahụ achọ onwe ya mma site na ide onwe ya uri n’ihu ma na-edozikwa ntụtụ isi ya. Ọ na-edozikwa nke ndị ọzọ. O kwuru na kemgbe o kpebiri iji ịhụnanya, nnabata nakwa obi ọma were hụta ọnọdụ ya na ọ na-ebo ị ndụ ya n’udo.
“A chọrọ m ka ndị nile nwere ọlụsị nwee nkwenye n’onwe ha. Unu dị egwu. Unu pụrụ iche ma nweekwa onyinye ọnatarachi n’agbanyeghị ọlụsị unu. Unu mara mma n’udi nke unu. Echiche ọbụla ma ọ bụ nrọ ọbụla ị na-arọ, o nwere onye ị dị mkpa, onye ọ ga-abara uru, gaa n’ihu chawapụ”
O nwere Nzere Mmụta na Ngalaba “Social Work” na Mahadum Cape Town, mba Sawụtụ Afrịka n’afọ 2019, nweekwa ụlọ ọrụ nke ya bụ SK, nke ọrụ ya bụ ikwu okwu mkpalite mmụọ (motivational speaking) na Nkwalite akparamagwa.
