NWANYỊ KWALI E BÒRÒ EBUBO ASỊ IZU ÚTÙ NWOKE NỌZỊ N’ỤLỌ Ọ́GWỤ̀ KA A ZỌPỤTACHARA N’AKA ÌGWÈ MMADỤ IWE JI
Abụja – Ótù nwata nwanyị Kwali, Abụja bụ Hanna Musa, onye e boro ebubo asị izu útù nwoke mmadụ nọzị n’ụlọ ọ́gwụ̀ agbake ka a zọpụtachara ya n’aka ígwè mmadụ ndị chọrọ igbunyu ya anya.
Ọdachi a dakwasịrị nwanyị ahụ n’ụbọchị Mọnde, abalị iri abụo na ise nke ọnwa Septemba afọ a n’ahịa Giri nọ na mpaghara Kwali.
Nwoke ahụ kwuru na o nwere ka ahụ siri mee ya oge nwanyị gàfèrè were metụ ya ahụ, mere na útù ya jírí fuo.
Nwoke ahụ tìrì mkpu mere ìgwè mmadụ jírí gbakọta, were iwe gbaa ya ọ̀tọ́, chọrọ igbunyu ya bụ nwanyị anya tupu ndi o metụrụ n’obi abịa zọpụta ya .
Kaosiladị, e mèchàrà chọpụta na útù ya bụ nwaamadị efughi efu. Nwanyị ahụ nọzị n’ụlọ ọ́gwụ̀ Pụrụ Iche nke Gwagwalada ugbua, agbake n’ókè mmerụ ahụ o nwetara n’aka ígwè mmadụ ahụ.
Onyeisioche Okpuru Ọchịchị Kwali, Hon Danladi Chiya, katọrọ ya bụ akaja na mmegide e megidere nwanyị ahụ, ma kwukwaa na ọ ga-ahụ na ndị aka ha dị na ya bụ ajọ akparamagwa nwetara ntaramahụhụ zuru òkè.
