NTỤGHARỊ UCHE

ỌGỤ NDỊ SOJA NA ESN: OKENYE ANỌZỊKWA N’ALA-IGBO?

Owere: Kaọdịtaa, Gọọmenti Imo Steeti amachiela ngagharị ọbụla na mpaghara Ọlụ, Imo Steeti maka ọgụ na-ada n’etiti ndị soja Naịjiriya na ndị òtù nchekwa ESN nke taworo isi ọtụtụ mmadụ.

N’ezie, ihe butere òtù nchekwa Eastern Security Network (ESN) bụ na ndị Gọvanọ Mpaghara Ọwụwa Anyanwụ Ndịda emeghị ihe ha kwesịrị ime maka nchekwa Ala-Igbo.

Ndigbo na ndị Yoroba malitere mkparịta ụka maka nhiwe òtù nchekwa mpaghara (Regional Security Outfit). Ndị Gọvanọ Mpaghara Ọdịda Anyanwụ Ndịda, site na nkwado ndị Yoroba nile, n’agbanyeghị òtù ndọrọndọrọ ọchịchị onye nọ, ehiwela òtù nchekwa Amotekun kemgbe.

Ọ bụrụ na ndị Gọvanọ anyị katara obi mee ihe ha kwesịrị ime, ọgụ agaghị ịdị ugbua n’etiti ndị soja na ndị ESN n’Ọ̀lụ́.

Kaosiladi, òtù nchekwa ESN ma ọ bụkwanụ òtù nchekwa ọbụla ga – adị N’Ala-Igbo ekwesịghị ịbụ nke mmalite na njedebe ya ga-abụ n’aka ndị IPOB.

Òtù nchekwa ahụ, dịka ndị Yoroba si eme, ga-enwe ndị okenye na-elebara ha anya maka mgbazi, ka ha ghara imefe ihe oke.

Ajụjụ a na-ajụzị bụ o nwezikwara ndị okenye n’Ala-Igbo? Ọkwa okenye anaghị anọ n’ụlọ ewu amụọ n’ọ́gbụ̀. Kedụzi ndị okenye ga-edozi okwu a site na ịhụ na ndị Gọvanọ Ala-Igbo (ndị iwu hanyere ọrụ nchekwa n’aka) na ndị IPOB /ESN (ndị nọ n’ọ́gbọ́ ọgụ maka nchekwa Ala-Igbo Kaọdịtaa) ga-enwe mkparịta ụka iji mee ihe nile n’usoro ya?

“Ụzụ amaghị akpụ ogele, lee égbé anya n’ọ́dụ̀”. Leenụ ka ndị Yoroba si jiri akọ were dozie okwu dapụtara n’etiti ndị òtù Sunday Igboho na ndị soja. Ma ndị Gọvanọ ha, ma ndi ndu ha dịka Tinubu, ma ndị nnupụisi ha dịka OPC siri jikọọ aka ọnụ.

Nghọtahie sitere na nhọpụta Ọhaneze Ndigbo meziri ka nsogbu kazịa njọ. Na Ikemba Emeka Ojukwu, Agụ Ndigbo anọghịkwa abụghị na mmadụ agwụla n’Ala-Igbo.

Show More

Related Articles

One Comment

  1. Ike gwuru, nke ka njọ bu na onwero onye n’ime ndị okenye ma obu ndi kpatara ego na ala Igbo chọrọ itinye ọnụ n’okwu. Igbo si na “mmiri doro na eju, doro nwa nkịta”. Emere elu emere ala, anyị nile ga ahụ isi ya.

Leave a Reply

Your email address will not be published. Required fields are marked *

Back to top button
Close
Close